استعادة الثقة والتوازن

"شكر واجب وتقدير لشخصك الكريم ومجهودك معايا خلال الجلسات اللي فاتت. عايز أقولك إني بجد ممتن جداً لحضرتك ومساعدتك ليا بطريقة محترفة وبإخلاص شديد خلتني أشعر باختلاف كبير بعد فترة قصيرة من بداية جلساتي معك. برغم إن الأزمات اللي عديت بيها صعب على أي راجل محترم إنه يعدي منها، خاصةً لما يكون طول عمره أسرته وأولاده كانوا أهم من أي حاجة تانية في حياته، لكن الحمد لله على كل شئ. أنا دلوقتي ثقتي في نفسي بدأت تقوى تاني، وبطلت ألوم نفسي على أقدار واختيارات كتير كانت غلط في حياتي كنت بعتبر نفسي المسؤول الأول عنها. بفضلك بدأت أشوف الصورة أوضح كتير من الأول، الغضب المكبوت ورغبة الانتقام والكوابيس اللي كانت بتطاردني حتى وأنا صاحي توقفت الحمد لله. أنا دلوقتي عندي أمل في بكره وإحساس إني ممكن أنجح وأقدر أحقق اللي فشلت فيه زمان وندمت عليه سنين طويلة. وليه لأ، ربنا كبير وما علينا إلا السعي، ومن ضمن السعي ده إن الواحد مش يكابر ويعترف إنه عنده مشكلة وإنه محتاج مساعدة من حد تاني، بس لازم يختار صح... لازم يختار حد يكون دارس وفاهم كويس وبيحب شغله وبيعمله بحب واحترام زي حضرتك. ألف شكر وجزاك الله كل خير على سعيك في الإصلاح، وفقك الله وسدد خطاك دائماً."